మళ్ళీ రావా...

నూతన దర్శకుడు గౌతమ్ తిన్ననూరి దర్శకత్వంలో సుమంత్ అండ్ ఆకాంక్ష జంటగా నటించిన కొత్త సినిమా మళ్ళీ రావా. ఈ సినిమా ట్రైలర్ ఇక్కడ చూడండి, పాటలు ఇక్కడ వినండి. ఇవి చూశాక సినిమా గురించి ఒక పాజిటివ్ ఫీల్ వచ్చి ఉంటే కనుక ఈ రివ్యూతో సహా మరే రివ్యూలు చదవకుండా సినిమా చూడండి. ఓ చక్కని ప్రేమకథని ఇంట్రెస్టింగ్ స్క్రీన్ ప్లే తో మనసుకు హత్తుకునేలా చెప్పాడు గౌతమ్. శ్రవణ్ భరద్వాజ్ అందించిన ఆహ్లాదకరమైన సంగీతం, గౌతమ్ రాసుకున్న సంభాషణలు ఈ అందమైన ప్రేమ కథకు చక్కని సపోర్ట్ ఇచ్చాయ్.

ఈ రోజు నుండీ రెండవ వారంలోకి అడుగుపెడుతున్న ఈ సినిమాకి మరికొన్ని థియేటర్స్ ను మల్టిప్లెక్స్ లో అదనపు షోస్ ను కలిపారంటే, ఈ సినిమా ఎంతగా అకట్టుకుంటుందో అంతకన్నా వేరే రుజువులేం కావాలి. కథాపరంగా ఇది అతి సాథారణ ప్రేమ కథ. ఓ సొగసరి అమ్మాయి, ఓ పోకిరి అబ్బాయి, ఒకరినొకరు చూసుకోవడం, ప్రేమించుకోవడం, ఆపై ఎడబాటు చివరికి పెళ్ళి ఏ ప్రేమ కథలోనైనా ఇంతకన్నా ఏముంటుంది చెప్పండి. ఐతే ఇదే కథను ఇప్పటికి కొన్ని వేల సినిమాల్లో చూసినా ఎప్పటికప్పుడు కొత్త దర్శకులు నేపథ్యాన్ని కథనాన్ని మార్చుకుంటూ అందంగా అకట్టుకునేలా మళ్ళీ మళ్ళీ చెబుతూనే ఉన్నారు. అలుపెరగకుండా ప్రేక్షకులు చూస్తూనే ఉన్నారు.

మళ్ళీరావా కథా కథనాలు కూడా అంత కొత్తవేం కావు ’సఖి’ సినిమాలో ’మణిరత్నం’, ’ఎటోవెళ్ళిపోయింది మనసు’ లో ’గౌతమ్ మీనన్’ లాంటి గొప్ప దర్శకులు ప్రయత్నించినవే అయితే ఈ చిత్ర దర్శకుడు గౌతమ్ తిన్ననూరి కథ రాసుకున్న తీరు దాని చుట్టు అల్లిన అందమైన అతి సహజమైన సన్నివేశాలు, సునిశితమైన హాస్యం ఈ చిత్రాన్ని ప్రేక్షకులకు దగ్గిర చేస్తుంది.

ఈ కథ ముఖ్యంగా మూడు కాలాల్లో జరుగుతుంది ఒకటి 1999 రెండవది 2012 చివరగా ప్రస్తుతం 2017. ఈ మూడు కాలాల కథను ఒకదానివెంట ఒకటిగా చెప్పకుండా ముఖ్యంగా హై స్కూల్ ఎపిసోడ్స్ ను ఫ్లాష్ బ్యాక్స్ తరహాలో హీరో హీరోయిన్ల జ్ఞాపకాలుగా చెప్పడానికి ప్రయత్నించారు. ఈ ప్రయత్నం మొదటిలో అంటే మనం కథలో లీనమయ్యేంత వరకూ కాస్త గందరగోళంగా అన్పించినా అదే ఒక ప్రత్యేకతగా నిలిచి మనం కథమీద పాత్రల మీద ఏకాగ్రత నిలపడానికి దోహదపడుతుంది. ఇలా ఫ్లాష్బాక్స్ చెప్పడంలో సన్నివేశాలను కనెక్ట్ చేసిన విధానం బావుంది. ఒక్కమాటలో చెప్పాలంటే తెలుగింటి ఆడపడుచు మూడు పాయలతో జడ అల్లుకున్నంత సులువుగా ఈ మూడు కాలాల సన్నివేశాలనూ అల్లుకుంటూ పోయాడు గౌతమ్.

ఈ రోజుల్లో ప్రెమ కథ లేని వ్యక్తులు చాలా అరుదుగా ఉంటారు, అయితే నిజ జీవితంలో అన్ని ప్రేమలూ ఒకేలా ఉండవు పుస్తకాలలో చెప్పే కొటేషన్స్ కి తగినట్లుగా ఉండే ఐడియల్ ప్రేమ కథలు నిజ జీవితంలో ఎక్కడో కానీ తారసపడవు. అయితే అసలైన, స్వచ్చమైన, నిజాయితీ అయిన ప్రేమంటే ఇలా ఉండాలి అని అందరికీ ఒక ఐడియా ఉంటుంది అది నిజజీవితంలో సాధ్యపడినా పడకపోయినా ఇలా ఉంటే బావుంటుంది అనిపిస్తుంది అలాంటి ప్రేమకథే ఈ "మళ్ళీ రావా". ("If you love some one set them free") నువ్వు ఎవరినైనా ప్రేమిస్తే వారికి పూర్తి స్వేచ్చనివ్వు, ఆ బంధాన్ని గుప్పిట బిగించి పట్టుకోవాలని ప్రయత్నించకు. అనే కొటేషన్ ను మనసా వాచా ఆచరించే ప్రేమ కథ "మళ్ళీ రావా".

ఇలాంటి ప్రేమ కథలకు సుమంత్ టైలర్ మేడ్, సత్యం, గోదావరి, ఆల్రెడీ ఈ విషయాన్ని ప్రూవ్ చేశాయ్, ఈ మళ్ళీ రావా లో కూడా అంతే ఈజ్ తో సులువుగా కార్తీక్ పాత్రలోకి ఒదిగిపోయాడు సుమంత్. నూతన నటి ’ఆకాంక్ష సింగ్’ అంజలి గా చూడడానికి అందంగా గ్రేస్ ఫుల్ గా కనిపించడమే కాక చక్కని నటనను ప్రదర్శించింది. ఈ సినిమాకి పెద్ద ఎస్సెట్స్ బాల(కౌమార) నటులు. చిన్నప్పటి కార్తీక్(సాత్విక్), అంజలి(ప్రీతి), డంబో గా చేసిన పిల్లలు ముగ్గురూ చాలా బాగా నటించారు ఆ సన్నివేశాలు అంత సహజంగా రావడంలో వీళ్ళ కృషి ఎంతో ఉంది. వాళ్ళతో పాటు టెంత్ ఫెయిల్ బుజ్జిగాడు గా చేసిన కుర్రాడు నానాజీ కూడా అమాయకమైన విలనిజంతో నవ్వించి గుర్తుండిపోతాడు. సెకండ్ ఎపిసోడ్ లో సాఫ్ట్వేర్ కంపెనీ మేనేజర్ గా చేసిన మిర్చీ కిరణ్ కూడా గుర్తుండిపోయే పాత్ర చేశారు, ఈయన చుట్టూ రాసిన సన్నివేశాలు నవ్వించాయి.   

ఈ సినిమా మొదట చూసినపుడు మొదటి అరగంటలో నేను కాస్త ఇబ్బందిపడింది పద్నాలుగేళ్ళ ప్రాయంలో తొమ్మిదో తరగతి చదువుతూ ప్రేమేంట్రా బాబు ఇపుడు ఈ క్లాస్ పిల్లల్ని కూడా మొదలు పెట్టేయమనా అని. కానీ ఏ మాత్రం అసభ్యతకు తావులేకుండా చాలా కన్విన్సింగ్ గా అతి సహజంగా ఆ సన్నివేశాలను రాసుకున్న తీరు, ఆ ఎపిసోడ్ కు చివర్లో ఇచ్చిన హుందా అయిన కంక్లూజన్ చూశాక ఆ కాస్త ఇబ్బంది కూడా తొలగిపోయింది ఈ దర్శకుడిపై అభిమానం మరింత పెరిగింది. ఇక సినిమా క్లైమాక్స్ నన్ను మరింతగా ఆకట్టుకుంది అతి సహజంగా తీశాడని అనిపించడానికి సినిమా ముగిసాక ఒక మంచి ఫీల్ రావడానికి అది కూడా ఒక ముఖ్య కారణం.
 

ఈ సినిమా గురించి రాసిన కొన్ని విశ్లేషణలలో అంత చదువు చదివి ఉన్నతమైన ఉద్యోగం చేస్తూ కూడా అమ్మ చెప్పిన మాట వినో తండ్రీ చెప్పిన మాట వినో తన నిర్ణయాన్ని మార్చుకోవడమనే విషయమై అంజలి వ్యక్తిత్వం పై మెచ్యూరిటిపై కొన్ని కామెంట్స్ చదివాను. నాకు మాత్రం తను చిన్నతనం నుండీ పెరిగిన పరిస్థితులు చూసిన అనుభావల దృష్ట్యా తన సంధిగ్దత చాలా సహజమే అనిపించింది. దర్శకుడు ఆ విషయాన్ని బాగా కన్వే చేశాడు. అలాగె జీవితానికి సంబంధించిన అతి ముఖ్య నిర్ణయాలలో ఒకోసారి అంతే జరుగుతుంది మనం ఎన్ని ఆలోచించి ప్లాన్ చేసుకున్నా కూడా పాజిటివో నెగటివో ఒక చిన్న పుష్ వల్ల ప్రభావితమై తీసుకునే నిర్ణయాలు తారుమారు అవుతుండడం సహజం. జాగ్రత్తగా గమనిస్తే ఈ విషయం ప్రతి ఒక్కరూ తమ జీవితంలోనో లేదా తన చుట్టూ ఉన్న వారి జీవితాల్లోనో చూసే ఉంటారు.  

సోషల్ నెట్వర్కింగ్ రోజులలో పుట్టి పెరిగిన ఈ కాలం యువత ఈ సినిమాకి ఏమాత్రం కనెక్ట్ అవుతారనేది చెప్పలేను కానీ పాతికేళ్ళ పైబడిన ప్రతి ఒక్కరు తొంభైలలో అంటే సెల్ఫోన్ రాక ముందు కాలాన్ని చూసిన వారందరూ కూడా ఈ సినిమాకు అందులోని ప్రేమ సన్నివేశాలకూ ఎక్కడో అక్కడ కనెక్ట్ అవుతారు. సినిమా అంటే రెండు గంటల్లో బోల్డంత జరిగిపోవాలని ఆశించే వాళ్ళు కాకుండా పేస్ గురించి ఆలోచించకుండా ఆహ్లాదకరమైన ప్రేమకథలను ఆస్వాదించే ప్రతి ఒక్కరూ తప్పక చూడవలసిన సినిమా "మళ్ళీ రావా".

ఈ సినిమాలో నాకు నచ్చిన సంభాషణలను కొన్నిటిని క్రింద పొందుపరుస్తున్నాను. దయచేసి ఈ సినిమా చూడని వాళ్ళు సినిమా చూసేప్పుడు ఫీల్ మిస్ అవ్వకూడదంటే చదవకుండా ఉండటం శ్రేయస్కరం.

"నేను వెళ్ళిపోయినందుకు నామీద కోపం లేదా?"
"నువ్వు నా దగ్గర ఉన్నప్పుడు ఇష్టపడటం.. దూరంగా ఉన్నప్పుడు బాధపడటం దానికి మించి నాకింకేం తెలీదు.."

"చేతకాని ప్రతివాడూ చెప్పే మాటే అది ఎవడో మోసం చేశాడని."

"చచ్చిపోయిన కోడే కదరా ఎక్కడికీ పారిపోదు కాస్త నిదానంగా తిను."

"నేను ప్రేమవల్ల గుర్తున్నానా.. ద్వేషం వల్ల గుర్తున్నానా.. ఆ రెండోమాట తలచుకుంటేనే భయమేస్తుంది."

"గుర్తు పట్టలేదా.. గుర్తు కూడా లేనా.. రెండో మాట తలచుకుంటేనే భయమేస్తుంది."

"మనిషి శరీరంలో ఎన్నిమార్పులొచ్చినా పదమూడేళ్ళ వయసునుండి చివరివరకూ మారనిది కళ్ళొక్కటే.. కార్తీక్ విషయంలో తన కళ్ళే కాదు నాకోసం చూసే చూపు కూడా మారలేదు." 

"ఆ అమ్మాయిని చూస్తున్నప్పుడు ఇష్టం కాదు ప్రేమ కాదు ఆనందం కాదు, ఆ క్షణంలో నాకేమనిపిస్తుందో గుర్తు కూడా ఉండదు."

"పద్నాలుగేళ్ళకి నాకూతురు ఐఐటి ప్రిపేర్ అవుతుందనో, స్పోర్ట్స్ లో కప్పొచ్చిందనో, క్లాస్ లో ఫస్ట్ వచ్చిందనో నలుగురు చెప్పుకుంటే వింటానికి చాలా బాగుంటుంది కాని ఇంకో అబ్బాయితో తిరుగుతుందని తెలిస్తే చాలా అసహ్యంగా ఉంటుంది."

"పద్నాలుగేళ్ళకే నాకు క్రికెట్ అంటే ఇష్టం, మా అమ్మ అంటే ఇష్టం, డంబో అంటే ఇష్టం, అలానే నాకు అంజలి అంటే కూడా ఇష్టం. ఇవన్ని తప్పు కానప్పుడు అంజలిని ఇష్టపడితే తప్పేంటి."

"పెళ్ళి చేస్కోవాల్సింది ఈరోజు వరకూ ఎలా ఉన్నామనే సమాధానంతో కాదు, ముందు ఎలా ఉంటామనే ప్రశ్నతో."

"ఆ పిల్ల నిన్ను పెళ్ళి చేస్కోనన్నప్పుడు ఎందుకు అని ఒక్క మాట కూడా అడగలేదంటే ఒక ఆడపిల్లను ఇంతకంటే ఎక్కువగా ఎవరర్ధం చేస్కోగలరు."

"ఇష్టపడిన పిల్లని ఎలా పెళ్ళిచేస్కోవాలని మగపిల్లాడాలోచిస్తాడు, ఆడపిల్ల మాత్రం పెళ్ళయిన తర్వాత ఎలా అని ఆలోచిస్తుంది."  

"నేనడిగితే సిగరెట్ మానేస్తావా!.."
"అడిగి చూడు.."
"ఊహూ.. అడగను.. నాకామాట చాలు.."

"నువ్వు తప్ప నాకు వేరె ప్రపంచమే తెలీదు అంజలి.. నువ్వున్నప్పుడు గడిపిన క్షణాలు... నువ్వు లేనప్పుడు మిగిలిన జ్ఞాపకాలు..."

మొత్తం చదవండి

మెంటల్ మదిలో...

సాధారణంగా ఒకటికన్నా ఎక్కువ ఆప్షన్స్ కనిపిస్తే మనందరం ఏది ఎన్నుకోవాలా అని అంతో ఇంతో కన్ఫూజ్ అవడం సహజం, మన అభిరుచి, అనుభవం, అవసరం ఇత్యాదులని బేరీజు వేసుకుని ఆలోచించి సరైన ఆప్షన్ ఎన్నుకుని ముందుకు సాగుతాం. ఐతే ఈ కన్ఫూజన్ మితిమీరిన మోతాదులో ఉన్న వ్యక్తే అరవింద్ కృష్ణ (శ్రీ విష్ణు). చిన్నతనం నుండీ కూడా ఆ రోజు ఏ డ్రస్ వేస్కోవాలో తల్లి డిసైడ్ చేసి ఇస్తే తప్ప రోజు మొదలవని అరవింద్ స్కూల్లో పరీక్షల్లో కూడా ఎస్సేటైప్ ఆన్సర్స్ పేజీలకు పేజీలకు రాసేసి మల్టిపుల్ ఛాయిస్ కొశ్ఛన్స్ కి మాత్రం తెల్లకాగితం ఇచ్చి వచ్చే రకం. ఎంతపెద్దైనా ఈ కన్ఫూజన్ అలా కొనసాగుతూనే ఉంటుంది. 

ఉన్న ఈ లక్షణం చాలదన్నట్లు చిన్నప్పుడే జరిగిన ఓ సంఘటన వల్ల అమ్మాయిలతో మాట్లాడాలంటే కూడా చచ్చేంత భయం, పక్కింటి అమ్మాయైనా క్లాస్మేట్ అయినా కనిపిస్తే తప్పించుకు తిరగడమే తప్ప మాటకలిపే అలవాటుండదు. అలాంటి మన హీరోగారికి పెళ్ళీడు వచ్చింది, ఇంకేముంది తండ్రి (శివాజిరాజా) గారి గుండెల మీద కుంపటే అయ్యాడు, ఆయన రెండున్నరేళ్ళ పాటు చేసిన విఫలయత్నాలతో విసిగిపోయున్న తరుణంలో ఓ స్నేహితుడి ద్వారా తెలిసిన ఓ ఇంటికి పెళ్ళి చూపులకి తీస్కెళతాడు కొడుకుని. 

ఆ అమ్మాయే "నాకేం కావాలో నాకు తెలియదా" అంటూ తన జీవితం మీద మంచి క్లారిటీ ఉన్న స్వేచ్ఛ(నివేదా పేతురాజ్). అనూహ్యంగా తనకి అరవింద్ నచ్చడం ఇద్దరి స్నేహం ముందుకు వెళ్ళడంతో ఎంగేజ్మెంట్ ఏర్పాట్లు జరుగుతాయి.. అన్నీ బావున్నాయనుకునే తరుణంలో కొన్ని పరిస్థితుల వల్ల ఎంగేజ్మెంట్ వాయిదా వేస్కోవలసి వస్తుంది. ఈ గ్యాప్ లో స్వేచ్ఛకు దూరంగా వేరే ఊరు వెళ్ళిన అరవింద్ కు రేణు (అమృత) పరిచయం అవుతుంది. స్వేచ్ఛ పరిచయం అవక ముందు తనకెలాంటి అమ్మాయి కావాలని తను కోరుకున్నాడో అలాంటి అమ్మాయి రేణు.

అసలే కన్ఫూజన్ మాస్టర్ అయిన మన హీరో గారికి ఇపుడు ఎవరితో జీవితాన్ని పంచుకోవాలనె కన్ఫూజన్ మొదలైపోతుంది. దానిని ఎలా అధిగమించి జీవితాన్ని సుఖాంతం చేసుకున్నాడో తెలియాలంటే "మెంటల్ మదిలో" సినిమా చూడాలి. పెళ్ళిచూపులు చిత్రాన్ని నిర్మించిన అభిరుచి గల నిర్మాత రాజ్ కందుకూరి తన రెండో చిత్రంలోనూ తన అభిరుచిని నిరూపించుకున్నారు. దర్శకుడు వివేక్ ఆత్రేయ సెకండాఫ్ లో బోంబే ఎపిసోడ్ దగ్గర కాస్త తడబడినా కానీ మంచి క్లైమాక్స్ తో చక్కని కథనాన్ని వ్రాసుకున్నారు. సినిమా పూర్తయేసరికి ఒక హాయైన సినిమా చూసిన అనుభూతిని కలిగిస్తుంది. పాటలు, నేపధ్యసంగీతం కూడా సినిమా మూడ్ కి తగినట్లుగా ఆహ్లాదకరంగా ఉన్నాయ్. 

శ్రీవిష్ణు, నివేధా చాలా సహజంగా పాత్రల్లో ఒదిగిపోయారు. హీరో తండ్రి పాత్రలో శివాజీరాజా అండ్ హీరోయిన్ తల్లి పాత్రలో అనితా చౌదరి పాత్రలు గుర్తుండిపోతాయ్. ఇద్దరి క్యారెక్టరైజేషన్ చాలా సహజంగా ఉంది. వీళ్ళ పాత్రలకూ సినిమాలో చూపించిన సింపుల్ పెళ్ళి చూపులు సీన్ కి చాలా మంది కనెక్ట్ అవుతారు.  కొన్ని సింబాలిక్ షాట్స్, ప్రిక్లైమాక్స్ లో తండ్రి హీరోకి ఇచ్చే సలహా అలాగే హీరోయిన్ కి తన తల్లి "మాకు నువ్వు ముఖ్యం పరువు, బంధువులు అన్నీ అందరూ నీ తర్వాతే" అని చెప్పే మాటలు ఆకట్టుకుంటాయి. వైవిధ్యమైన సినిమాలు ఇష్టపడే ప్రతి ఒక్కరు మిస్ అవకుండా చూడవలసిన సినిమా "మెంటల్ మదిలో". ఇలాంటి మంచి సినిమాలని ప్రోత్సహించవలసిన అవసరం ఎంతైనా ఉంది. ఈ సినిమా ట్రైలర్ ఇక్కడ చూడవచ్చు.  

మొత్తం చదవండి

శమంతకమణి...

హైదరాబాద్ నగరంలోని అత్యంత ధనవంతులలో ఒకరు జగన్నాథ్(సుమన్). అతని కొడుకు మంచి మనసున్న కృష్ణ(సుధీర్ బాబు) తన పుట్టినరోజు పార్టీలో మిత్రులకి పరిచయం చేయడానికి తన తండ్రికి ఇష్టమైన రోల్స్ రాయిస్ వింటేజ్ కార్ "శమంతకమణి" ని అతనికి తెలియకుండా తీస్కెళతాడు. పార్టీ ముగిసే సరికి ఆ కార్ దొంగతనానికి గురవుతుంది. చిన్నపుడు తన తల్లి కొనిస్తానని మాటిచ్చిన ఆ కార్ ఇంటికి వచ్చిన దగ్గర నుండీ తనకి దూరమైన తల్లే తిరిగి వచ్చిందన్నంతగా సంబర పడుతున్న కృష్ణ ఆ కార్ ని వెతికి పట్టుకోవాలని పోలీస్ ఇన్స్పెక్టర్ రంజిత్ కుమార్ సహాయం కోరతాడు. 

రంజిత్ కుమార్ (నారా రోహిత్) ఒక కరప్ట్ పోలీస్ ఇన్స్పెక్టర్ తన లైఫ్ సెటిలైపోయేలాంటి ఏదైనా ఒక స్కామ్ / సెటిల్మెంట్ చేసి డబ్బు సంపాదించాలన్నది అతని జీవితాశయం. ఆ అవకాశం కోసం ఎదురు చూస్తూ చిన్న చిన్న చిల్లర వసూళ్ళతో జీవితం నెట్టుకొస్తుంటాడు. ఈ కారు పట్టుకుంటే వచ్చే డబ్బుతో తన లైఫ్ సెటిల్ ఐపోతుందని ఇన్వెస్టిగేషన్ మొదలుపెడతాడు.      

శివ(సందీప్ కిషన్) ఒక అమాయకమైన పల్లెటూరు యువకుడు, ఊరిలో తను ప్రేమించిన అమ్మాయి తనని ప్రేమించి కూడా తన దగ్గర డబ్బులేని కారణంగా తనకు దూరమైందన్న కోపంతో ఎలాగైనా డబ్బు సంపాదించి చూపించాలని ఎదురు చూస్తుంటాడు. 

కార్తీక్(ఆది సాయికుమార్) ఒక మధ్యతరగతి కుర్రవాడు తన చిన్ననాటి స్నేహితురాలైన ఓ డబ్బున్నమ్మాయిని ప్రేమిస్తాడు. తనకీ తన ప్రేయసికి ఉన్న ఆర్ధిక అంతరాల వల్ల ఇన్ఫీరియారిటీ కాంప్లెక్స్ పెంచేసుకున్న కార్తీక్ తమ మధ్య జరిగే ప్రతి సంఘటనలోనూ తన వద్ద డబ్బులేని కారణంగా ప్రేయసి తనని చులకన చేస్తుందని ఫీలవుతూ ఎలాగైనా డబ్బుసంపాదించాలని ఎదురు చూస్తుంటాడు.  

 

ఉమా మహేశ్వరరావ్(రాజేంద్ర ప్రసాద్) ఒక సాధారణ కార్ మెకానిక్, తన ఎదురింట్లో ఉండే ఇంద్రజని ప్రేమించి ఆమెతో లైఫ్ లో సెటిల్ అవాలని ఎదురు చూస్తుంటాడు అయితే అందుకోసం ఆమె చుట్టూ ఉన్న సమస్యలను తీర్చడానికి కొంత డబ్బు అవసరం ఉంటుంది. ఎలాగైనా సంపాదించాలని మార్గాలు వెతుకుతుంటాడు. 

ఈ ముగ్గురికి ఆ కార్ కి సంబంధం ఏమిటి.. అసలా కార్ ఏమైంది.. ఇన్వెస్టిగేషన్ ఎలా నడిచింది.. చివరికి కార్ దొరికిందా లేదా ఇత్యాది వివరాలు తెలుసుకోవాలంటే శ్రీరామ్ ఆదిత్య దర్శకత్వంలో వచ్చిన "శమంతకమణి" చిత్రం చూడాల్సిందే. ఉండటానికి నలుగురు హీరోలున్నా ఈ సినిమాలో అసలు హీరో అంటూ ఎవరూ లేరు. ఎవరిదీ ప్రధాన పాత్ర కాకపోవడంతో డాన్సులు ఫైట్లు అని ఫోకస్ చేయాల్సిన అవసరం లేకుండా ఎవరికి వాళ్ళు ప్రశాంతంగ తమకిచ్చిన పాత్రలో ఒదిగిపోయారు.  

"మన కుర్రాళ్ళందరికీ అమ్మాయిలవల్లే ప్రాబ్లమ్స్ బ్రో.." అంటూ బాధ పడి పోయే ముదురు బాచిలర్ పాత్రలో రాజేంద్రప్రసాద్ ఆకట్టుకుంటాడు అతని ప్రియురాలిగా ఇంద్రజ అందంగా కనిపించింది. వీరిద్దరినీ జంటగా తెరమీద చూడ్డం బావుంది. కరప్ట్ పోలీసాఫీసర్ గా నారా రోహిత్ చాలా సహజంగా నటించేశాడు అతని సైడ్ కిక్ గా కానిస్టేబుల్ పాత్రలో రఘు కారుమంచి నవ్వించాడు. సందీప్, సుధీర్, ఆది సాయికుమార్ కూడా తమ పాత్రల్లో ఆకట్టుకున్నారు. 

టెక్నికల్ గా మణిశర్మ నేపథ్యసంగీతం, సమీర్ రెడ్డి సినిమాటోగ్రఫీ, ప్రవీణ్ పుడి ఎడిటింగ్, శ్రీరామ్ ఆదిత్య సంభాషణలు బావున్నాయ్.. ముడులు వేసుకుంటూ వచ్చే మొదటి సగం కాస్త నెమ్మదిగా సాగినట్లు అనిపించినా చిత్రం సెకండాఫ్ నుండీ ఆసక్తికరంగా కూర్చో బెడుతుంది ఊహించని క్లైమాక్స్ ఆశ్చర్యపరుస్తుంది. 

పాటలు ఫైట్లు కామెడీ ట్రాక్ లు అంటూ ఫార్మాట్ ఫిల్మ్స్ కాకుండా వైవిధ్యమైన సినిమాలను, క్రైమ్ థ్రిల్లర్స్ ను ఇష్టపడే వాళ్ళు మిస్సవకుండా చూడవలసిన ఈ చిత్రం రేపు శనివారం అంటే 11 నవంబర్ 2017 న సాయంత్రం 6:30 గంటలకు జెమినీ టీవీలో ప్రసారమవబోతుంది, మిస్సవకండి. 

ఈ సినిమా టీజర్ ఇక్కడ మరియూ థియాట్రికల్ ట్రైలర్ ఇక్కడ చూడవచ్చు. జెమినీటీవీ ప్రోమో ఇక్కడ చూడవచ్చు. ఈ సినిమా గురించి మిత్రులు నెమలికన్ను మురళి గారి మాటల్లో ఇక్కడ చదవచ్చు.  

మొత్తం చదవండి

PSV గరుడవేగ 126.18M

డాక్టర్ రాజశేఖర్ ని బిగ్ స్క్రీన్ మీద చూసి ఎన్నాళ్ళవుతుందో అని లెక్కలేసుకుంటే అప్పుడెప్పుడో చూసిన అల్లరి ప్రియుడు గుర్తొస్తుంది ఆ తర్వాత ఇంక ఇంతవరకూ నేను థియేటర్లో చూసిన సినిమాలేవీ గుర్తు రావడమే లేదు. అలాంటిది ఇన్నాళ్ళకు ఒక పవర్ ఫుల్ ట్రయలర్ ప్లస్ ప్రవీణ్ సత్తార్ మీద ఉన్న నమ్మకం నన్ను థియేటర్ వైపు నడిపించింది. థియేటర్లో ఉన్న ఇతరులు కూడా "రాజశేఖర్ సినిమా మొదటి సారి థియేటర్లో చూస్తున్నా మామా" అని అనుకోవడం విని నవ్వుకున్నాను. 

సినిమా మొదటిసగం పూర్తయే సరికి వావ్! వావ్! వావ్! వావ్! వాటే మూవీ! అనుకుని ఆశ్చర్యపోవడం నా వంతైంది. రెండవ సగం పూర్తయేసరికి ఆ వావ్ లలో కొన్నివావ్ లు తగ్గిపోయినా కానీ ఓవరాల్ గా మంచి యాక్షన్ థ్రిల్లర్ చూసిన అనుభూతి కలిగించారు ప్రవీణ్ అండ్ టీమ్. కమర్షియాలిటీ కోసం హాస్యం కోసం అక్కడక్కడ అనవసరంగా చేసిన ప్రయత్నాల వల్ల ఇది కేవలం ఒక మంచి సినిమాగా మాత్రమే మిగిలిపోయింది కానీ అవి కూడా లేకుండా ఉండుంటే తెలుగు యాక్షన్ సినిమా ట్రెండ్ ని మార్చగలిగే సినిమా అయి ఉండేది. 

హాలీఉడ్ సినిమాలను అనుకరిస్తూ ఇటువంటి భారీ యాక్షన్ సన్నివేశాలు ఇదివరకు కూడా కొన్ని సినిమాలలో ప్రయత్నించినా కానీ ఈ సినిమాలో అ సన్నివేశాలు కావాలని తెచ్చిపెట్టినట్లుగా అతికించినట్లుగా కాక కథలో ఇమిడిపోయేలా వ్రాసిన ప్రవీణ్ రైటింగ్, దానికి చక్కగా అమరిన నేపధ్యసంగీతం, సినిమాటోగ్రఫీ కలిసి ఒక మంచి అనుభూతిని మన సొంతం చేస్తాయ్. సినిమా మొదటి సగం ఐతే హాస్య సన్నివేశాలని తప్పిస్తే చాలా చక్కని గ్రిప్పింగ్ స్క్రీన్ ప్లే తో నడిపాడు సినిమాని.

ఎన్.ఐ.ఏ. కమిషనర్ చంద్రశేఖర్ గా రాజశేఖర్ ఎక్కడా ఓవరాక్షన్ చేయకుండా తన మేనరిజమ్స్ అన్నిటిని పక్కన పెట్టేసి తూకమేసినట్లుగా చక్కని నటనని ప్రదర్శించారు. ముసలితనం ఛాయలు అక్కడక్కడా కనిపించినా కానీ కాస్టూమ్స్ తోనూ తన స్టైలింగ్ తోనూ హాలీఉడ్ సినిమాల్లో చూసే ఒక మిడిల్ ఏజ్డ్ ఏజెంట్ ఎలాగైతే ఉంటాడో అలాగే కనిపించి ఆకట్టుకున్నారు. తనకి డబ్బింగ్ చెప్పిన సాయికుమార్ వాయిస్ మరో పెద్ద ఎసెట్. పూజా కుమార్ పాత్ర విశ్వరూపంలో పాత్రకు ఎక్స్టెన్షన్ లా అనిపిస్తుంది. హ్యాకర్ గా చేసిన అదిత్ పాత్రకి తగినట్లు ఉన్నాడు, మెయిన్ విలన్ గా చేసిన కిషోర్ పాత్ర క్లైమాక్స్ లో తేలిపోయింది. ఉన్న కాసేపైనా బిగ్ బాస్ ఫేమ్ ఆదర్శ్ స్టైలిష్ ప్రజన్స్ తో గుర్తుండి పోతాడు. మిగిలిన నటీ నటులంతా తమ తమ పాత్రలకు న్యాయం చేశారు.

ఈ సినిమాలో కీలకమైన పాత్ర పోషించినది టెక్నికల్ టీమ్, సినిమాటోగ్రఫీ అందించిన టీం అంజి, గికా చెలిడ్జే, బకుర్‌ చికోబవ, సురేష్‌, శ్యామ్‌ ఇంకా నేపధ్య సంగీతం అందించిన శ్రీచరణ్ పాకాల, ఎడిటింగ్ తో ఫస్ట్ హాఫ్ ని పరిగెట్టించిన ధర్మేంద్ర కాకరాల కృషిని అభినందించి తీరాలి. సినిమా కథ గురించి నేను ఏమీ చెప్పదలచుకోలేదు... సాథారణంగా స్పై థ్రిల్లర్స్ లో ఉండే కథే ఇది కూడా. అయితే ఆ కథను ఒక్కో ముడీ విప్పుకుంటూ చెప్పిన తీరు చాలా బాగుంది. అలాగే అక్కడక్కడా సినిమాటిక్ లిబర్టీస్ తీస్కున్నా కానీ యాక్షన్ సన్నివేశాలతో సహా చాలా సన్నివేశాలలో లాజిక్ ను వదిలి పెట్టలేదు. సినిమాలో కొన్ని నెగటివ్ పాయింట్స్ ఉన్నా కూడా ఈ గ్రిప్పింగ్ నెరేషన్ వాటిని పట్టించుకోకుండా ఉండేలా చేస్తుంది. 

మొత్తం మీద ఒక్కొ సినిమాకి ఒక్కో జెనర్ ని ఎన్నుకుంటున్న ప్రవీణ్ సత్తారు ఈ యాక్షన్ థ్రిల్లర్ ను తనదైన శైలిలో మనముందుకు తీస్కొచ్చారు. యాక్షన్ స్పై థ్రిల్లర్స్ ఇష్టపడే వాళ్ళు తెలుగు తెరమీద వైవిధ్యమైన సినిమాలను చూడాలనుకునే వాళ్ళు, ఒకప్పటి (ఆహుతి, అంకుశం, మగాడు, అల్లరి ప్రియుడు) రాజశేఖర్ అభిమానులు మిస్సవకుండా చూడవలసిన సినిమా పి.ఎస్.వి. గరుడవేగ. వీలైతే కథ గురించి తెలుసుకోకుండా ట్రైలర్ ఇక్కడ చూసి సినిమాకి వెళ్ళండి ప్రవీణ్ అండ్ టీం మిమ్మల్ని నిరాశ పరచరు.

మొత్తం చదవండి

బిగ్ బాస్...

బిగ్ బాస్ అనే రియాలిటీ షో తెలుగులోనా.. అసలా షో ఫార్మాట్ చుట్టూ ఉండే కాంట్రవర్సీలు, ఆ కంటెంట్ మన తెలుగు ప్రేక్షకులను ఏమాత్రం అలరిస్తాయి... అసలదే కంటెంట్ ని యాజ్ టీజ్ గా తెలుగులో చూపించగలరా.. తారక్ ఏమాత్రం హోస్ట్ చేయగలరో.. సెలెబ్స్ ఎవరు వస్తారో ఇలా పలు అనుమానాల మధ్య షో స్టార్ట్ అయింది.. నిజం చెప్పాలంటే సెలెబ్రిటీస్ లిస్ట్ చూశాక వీళ్ళని ఎన్టీఆర్ గారు హోస్ట్ చేయడమేంటి ఏమొచ్చింది ఈ బిగ్ బాస్ టీమ్ కి ఈ సెలెక్షన్ ఎంటి అని షోమీద ఇంట్రస్ట్ పూర్తిగా తగ్గిపోయింది. 

మొదటి వీకెండ్ ఇంట్రడక్షన్ అయ్యాక రెండవ వీకెండ్ తారక్ షో చూశాక  కేవలం తన యాంకరింగ్ కోసం చూడచ్చేమో అనిపించింది ఆ తర్వాత వీకెండ్ నుండి ప్రతి వీకెండ్ కేవలం తారక్ కోసమే చూడడం మొదలు పెట్టాను. వాట్ ఏన్ ఎంటర్ టైనర్ హీ ఈజ్.. మెల్లగా మా ఇంట్లో కూడా అందరూ ఈ షోకి అడిక్ట్ అయి నాకు వీక్ డేస్ చూడడం కుదరకపోయినా ఎవరో ఒకరికి ఫోన్ చేసినపుడు హైలైట్స్ వింటూ వచ్చాను. 

రాను రాను ఈ ఫైనల్ వీక్ కి వచ్చేసరికి ఇపుడు ఆ ఫైనలిస్ట్స్ అందరినీ తెలుగు కుటుంబాలు తమ ఇంట్లో ఒక్కరిగా ట్రీట్ చేస్తూ అచ్చం తారక్ చెప్పినట్లే వాళ్ళ ఇంటితో పాటు బిగ్ బాస్ ఇంటిపై ఒక కన్ను వేసి ఉంచుతూ తమ కంటెస్టంట్ ని సేవ్ చేస్కోవాలని వాళ్ళని గెలిపించాలని వాళ్ళు పడే తాపత్రయం వారం వారం పెరుగుతున్న వోట్ల సంఖ్యను చూస్తేనే అర్ధమవుతుంది. 

మొదటలో టిపికల్ టీవీ సోప్స్ తరహాలో ఏడుపులు మొత్తుకోళ్ళతో మొదలైనా కానీ రాను రాను ఎంటర్టైన్మెంట్ కి విలువిచ్చే టాస్కులతో (రిక్షా, స్కూల్), కంటెస్టంట్స్ లోని టాలెంట్ ని చూపే పెర్ఫార్మెన్స్ తో ఆకట్టుకోవడంలో బిగ్ బాస్ టీమ్ ప్రయత్నాలని మెచ్చుకోకుండా ఉండలేం. మొత్తం షోని ప్రపంచవ్యాప్తంగా ఉన్న ఫార్మాట్ ని కాస్త మార్చేసి తెలుగు ప్రేక్షకుల అభిరుచికి తగ్గట్టు కస్టమైజ్ చేసినందుకు వారిని అభినందించి తీరాలి. 

ఇదంతా ఒక ఎత్తైతే తారక్ హోస్టింగ్ ఒక్కటీ ఒకఎత్తు ఎక్కడా ఒక్క నిముషం కూడా బోర్/విసుగు అనే పదాలకి ఆస్కారమివ్వకుండా తను ఎంటర్టైన్ చేసే తీరు అభినందనీయం. తన చలాకీతనం, సమయస్ఫూర్తి, కలుపుగోలు తనం, కంటెస్టెంట్స్ తో ఇంటరాక్ట్ అయ్యే తీరు వారితో ఫ్రెండ్లీగా ఉంటూనే వాళ్ళని నొప్పించకుండా వారిలో లోటుపాట్లను సున్నితంగా ఎత్తి చూపించిన తీరు అమోఘం.  

ఎన్టీఆర్ గురించి ఒక్క మాటలో చెప్పాలంటే సమ్మోహనాస్త్రంతో ప్రేక్షకులను కట్టిపడేశాడంతే. మిగిలిన సెలబ్స్ సంగతేమో కానీ ఈ షో వల్ల తారక్ తెలుగు ప్రేక్షకులకు మరింత దగ్గరయ్యాడు ఇంట్లోని మనిషయ్యాడు తనకు ఖచ్చితంగా ఫ్యాన్ ఫాలోయింగ్ పెరిగిఉంటుందని నా ఉద్దేశ్యం. మొదట్లో ఏమో అనుకున్నాను కానీ తనని హోస్ట్ గా సెలెక్ట్ చేయడమే బిగ్ బాస్ టీమ్ తొలి విజయం అని మొదటి రెండు మూడు వారాల్లోనే ఆర్ధమై పోయింది. 

ఇక కంటెస్టెంట్స్ విషయానికి వస్తే నా పర్సనల్ ఫేవరెట్స్ హరితేజ అండ్ నవదీప్. ఎంటర్టైన్మెంట్ విషయంలో వీరిద్దరూ ఫస్ట్ మార్క్ కొట్టేస్తే శివబాలాజి అండ్ ఆదర్శ్ ఎంటర్టైన్మెంట్ తో పాటు తమని తాము మౌల్డ్ చేసుకుంటూ అన్ని ఎమోషన్స్ ని సమపాళ్ళలో పండించారని అనిపిస్తుంది. తన నాగింగ్ తో కంటెస్టెంట్స్ కి ప్రేక్షకులకి కూడా టీజింగ్ టార్గెట్ గా మారిన అర్చనని ఆఖరికి బిగ్ బాస్ కూడా టీజ్ చేసిన ఎపిసోడ్స్ హిలేరియస్ కాదనగలరా ఎవరైనా. 

ఈ షో ఫైనలిస్టుల గురించి బిగ్ బాస్ హౌస్ లో వారి జర్నీ గురించి నిన్నటి ఎపిసోడ్ ఒక సమ్మరీ ఇస్తుంది ఆ ఎపిసోడ్ మిస్ అయిన వాళ్ళు ఇక్కడ చూసి మరి మీ ఫేవరెట్ కంటెస్టెంట్ కి ఓట్ వేసి తనని గెలిపించుకోండి. ఇలాగే రాబోయే బిగ్ బాస్ సీజన్లు ఎన్టీఆర్ హోస్టింగ్ తో మరింతగా అలరిస్తాయని అనుకుంటున్నాను. బిగ్ బాస్ లో ఎన్టీఆర్ అమేజింగ్ జర్నీ గురించిన వీడియో ఇక్కడ చూడవచ్చు.

మొత్తం చదవండి

అమీ తుమీ..

సినిమా ఇండస్ట్రీ అంతా స్ట్రిక్ట్ గా ఫాలో అయ్యే సక్సెస్ ఫార్ములా వెనక పరుగెట్టడమనే జాడ్యానికి దూరంగా ఉండే అతి కొద్దిమంది దర్శకులలో ఇంద్రగంటి మోహనకృష్ణ ఒకరు. అందుకే ఆయన తీసిన సినిమాలన్నీ వేటికవే వేరు వేరు జెనర్స్ లో ఉంటాయి. సినిమాని ఎలా సక్సెస్ చేయాలా అనే ఆలోచనతో కాక ఒక మంచి కథను ఎలా చెప్పాలా అని ఆలోచించే వ్యక్తి తను. తెలుగు సాహిత్యం తన వారసత్వం దానికి తోడు చిన్నప్పటి నుండీ తను చదివిన సాహిత్యం అతనిని ఒక విశిష్టమైన దర్శకునిగా నిలబెట్టింది. భాష మీద పదాల మీద తనకున్న పట్టు ఈ సినిమా మాటల్లో అలవోకగా చిలకరించిన హాస్యాన్ని చూస్తే తెలుస్తుంది. 

ఇంతకీ నేను దేని గురించి చెప్తున్నానో చెప్పనే లేదు కదూ ఇంద్రగంటి మోహనకృష్ణ గారి దర్శకత్వంలో మొన్ననే రిలీజ్ అయిన "అమీ తుమీ" సినిమా గురించండీ. అవడానికి అవసరాల శ్రీనివాస్, అడివి శేషు హీరోలైనా ఈ సినిమా అయ్యాక గుర్తుండేది మాత్రం శ్రీచిలిపి గా చేసిన వెన్నెల కిషోర్ మాత్రమే. తను మాటలు తక్కువ ఎక్సెప్రెషన్స్ ఎక్కువ ఉపయోగించి పండించిన హాస్యం చాలా కాలం గుర్తుంటుంది. తన డైలాగులు, మానరిజమ్స్, అక్కడక్కడా వాడే ఇంగ్లీష్ లైన్స్ అన్నీ కడుపుబ్బా నవ్విస్తాయ్. అలాగే ఈషా, అదితీ హీరోయిన్లైనా గుర్తుండి పోయేది మాత్రం కుమారి పాత్ర పోషించిన శ్యామల గారే. అసలు సినిమాకి వీళ్ళిద్దరే హీరో హీరోయిన్లన్నంతగా వారి నటనతో మెప్పించేస్తారు. 

అలా అని అసలు హీరో హీరోయిన్లని ఏమాత్రం తక్కువ చేయలేం. ఖతర్నాక్ పోరిగా ఈషా, నన్ అయితే పానీపూరీ, హృతిక్ రోషన్, ఇనార్బిట్ మాల్ లో షాపింగ్ లు వదిలేయాలా అని అమాయకంగా అడిగే పాత్రలో అదితి కూడా బాగానే మెప్పించారు. అలాగే ఎలాంటి పాత్రలో ఐనా ఇట్టే ఇమిడి పోగల అవసరాల అల్లుకుపోతే సీరియస్ పాత్రలే తప్ప సీరియస్ కామెడీ ఇంతవరకూ ప్రయత్నించని అడివి శేష్ కూడా తన టైమింగ్ తో మెప్పించాడు. 

ఇక మా తనికెళ్ళ భరణి గారి గురించి కొత్తగా చెప్పేదేముంది చెప్పండి అదరగొట్టేశారు అలాగే వెన్నెలకిషోర్ కి అసిస్టెంట్ కాశి గా చేసిన నటుడు కూడా ఆకట్టుకుంటాడు. తనికెళ్ళ భరణి గారి తెలంగాణా యాస అలవాటు కనుక బాగున్నా అవసరాల, ఈషా ల తెలంగాణా యాస మాత్రం కాస్త అలవాటయ్యే దాకా అబ్బా అవసరమా ఈ గోస అనుకునేలా కాస్త తలనొప్పి తెప్పిస్తుంది అదీ ఓ పావుగంట మాత్రమే ఆ తర్వాత సినిమాలో లీనమై వాళ్ళ యాస అలవాటైపోయి ఇక అంతగా పట్టించుకోం. 

మణిశర్మ గారు ఇచ్చిన రెండు పాటలూ చాలా బాగున్నాయ్ "అయ్ బాబోయ్" మెలోడీతో ఆకట్టుకుంటే "తకథిమి తాన" పాట ఫుట్ టాపింగ్.. మనతో స్టెప్పులు వేయించేస్తుంది. చివర్లో సినిమా అయ్యాక ఈ పాట వస్తుంటే లేచి వచ్చేస్తూ తనికెళ్ళ గారు ఈ పాటకి వేసిన స్టెప్పులు వేయకుండా కంట్రోల్ చేస్కోడం చాలా కష్టమైందంటే నమ్మండి. బ్యాక్ గ్రౌండ్ స్కోర్ లో మా మణిశర్మ గారిని కొట్టేవారు లేరు అది బాగుందని మళ్ళీ ప్రత్యేకంగా చెప్పాలా చెప్పండి..

సినిమాలో మిగిలిన టెక్నికాలిటీస్ అన్నీ కూడా వంకపెట్టలేనివిగా ఉన్నాయి. నిజం చెప్పాలంటే ఇంద్రగంటి గారి వరుస పంచ్ లను వేటినీ మిస్ అవ్వకుండా ఫాలో అవుతూ ఆనందించడంలో మిగిలినవేవీ పట్టించుకోం. నిజమండీ బాబు కొన్నిసార్లు ఒక జోక్ కి నవ్వుకునే లోపు మరి రెండు మిస్ అయ్యాయేమో అని అనిపించిందంటే అతిశయోక్తి కాదు మళ్ళీ ఓ సారి చూస్తే కానీ అన్నీ ఫాలో అయినదీ లేనిదీ నిర్ధారించుకోలేను. 

ఇంత చెప్పి కథేంటో చెప్పవేమయ్యా అంటారా... కథేం లేదండీ.. అప్పుడెపుడో ఎస్వీకృష్ణారెడ్డి గారు తీసిన వినోదం సినిమాలో ప్రకాష్ రాజ్ పెళ్ళి ఎపిసోడ్ ని రెండు గంటల సినిమాగా మారిస్తే అదే అమీతుమీ కానీ దీనికి ఇంద్రగంటి మోహన కృష్ణ గారు తన రచనతో ఇచ్చిన ట్రీట్మెంట్ మనల్ని కడుపుబ్బ నవ్విస్తుంది. ఇంద్రగంటి మోహన కృష్ణ గారి సినిమాలు ఇష్టపడేవారు మిస్ అవ్వకుండా చూడాల్సిన సినిమా. ఊహూ.. ఆయన అభిమానులే కాదండీ మనసారా హాయిగా నవ్వుకోవాలనుకునే ప్రతి ఒక్కరూ తప్పక చూడాల్సిన సినిమా 'అమీ తుమీ' మిస్ అవ్వకండి. క్రింద ఎంబెడ్ చేసిన ట్రైలర్ ఇక్కడ చూడవచ్చు. ఈ సినిమా గురించి మిత్రులు "నెమలికన్ను మురళి" గారి మాటల్లో ఇక్కడ చదవవచ్చు. ఈ సినిమా గురించి నేనభిమానించే సమీక్షకులు సికందర్ గారి రివ్యూ ఇక్కడ చదవచ్చు. 

మొత్తం చదవండి

అమ్మ...

ఇంటికి పెద్ద నాన్నే అయినా అమ్మ ప్రేమ ముందు మాత్రం ఆయనతో సహా అందరం చిన్నవాళ్ళమైపోతాము కదా. ఎపుడైనా ఏ చిన్న అనారోగ్యం కానీ అసౌకర్యం కానీ కలిగితే అమ్మ తీసుకునే అన్ని జాగ్రత్తలు ఇంకెవరూ తీస్కోలేరు. అసలు అమ్మ అవగానే అమ్మాయిలకు ఆటోమాటిక్ గా ఒక ప్రత్యేకమైన ఆలోచనా విధానం అలవాటైపోతుందేమో.

మిగిలిన వాళ్ళందరూ తీస్కునే జాగ్రత్తలు ఒక ఎత్తైతే మన అమ్మ చేసే పనులు మాత్రం ప్రత్యేకం. బహుశా మన చిన్నతనం నుండీ మనని నిరంతరం దగ్గిరగా గమనిస్తూ నిత్యం మన సంతోషం గురించే ఆలోచించడం వలన అమ్మ అలా అన్నీ మనకి మాక్సిమమ్ సౌకర్యాన్ని ఇచ్చే విధంగా ఏర్పాటు చేయగలుగుతుందేమో.

నా చిన్నతనంలో స్కూల్లో ఎపుడైనా పొద్దున్న ఫస్ట్ ఇంటర్వెల్ లోనే గ్రౌండ్ లో పడిపోవడమో ఇంకేదో జరిగి దెబ్బతగిలించు కుంటే స్కూల్లో టీచర్స్ ఫస్ట్ ఎయిడ్ లాంటివి చేసి ఎన్ని జాగ్రత్తలు తీస్కున్నా సాయంత్రం ఇంటికి వెళ్ళగానే మళ్ళీ అమ్మ ఫ్రెష్ గా చేసే ట్రీట్మెంట్ వేరుగా ఉంటుంది. అసలు అమ్మ ఇచ్చే భరోసా ఇంకెవరూ ఇవ్వగలిగే వారు కారు. ఒక్క నాకే ఏంటిలెండి అమ్మలందరూ వాళ్ళ పిల్లలని అలానే చూసుకుంటారేమో కదా.

మా అమ్మ అయితే నన్నే కాదు మా ఇంట్లో అందర్నీ ఇలాగే చూస్కునేది. నాన్నారు కానీ మాలో ఎవరైనా కానీ ఒకోసారి బయటకి వెళ్ళినపుడు చెప్పిన టైమ్ కి ఇంటికి రాలేక కాస్త ఆలశ్యమైతే తన హడావిడి మాటల్లో చెప్పనలవి కాదు. ఇప్పుడంటే సెల్ఫోన్స్ ఉండడంతో అమ్మలకి ఈ బాధ తప్పింది కానీ లాండ్ ఫోన్లే కరువైన నా చిన్నతనంలో ఈ తిప్పలు మాములుగా ఉండేవి కావు. అందుకనే ఏ స్నేహితుడి ఇంట్లోనో కాస్త ఎక్కువ సేపు ఉండమంటే ఇంటిదగ్గర అమ్మ ఎదురు చూస్తుంటుందని వెంటనే బయల్దేరిపోవడం అలవాటు చేసేసుకున్నాం మేం.

నేను విజయవాడ హాస్టల్లో ఉంటూ ఇంటర్మీడియట్ చదువుకుంటున్నపుడు తరచుగా కడుపునొప్పి బాగా ఇబ్బంది పెడుతుండేది ఒకానొక సమయంలో హాస్పిటల్లో అడ్మిట్ అవ్వాల్సిన అవసరమొచ్చింది. అది ఎంత మంచి హాస్పటల్ అయినా ఎన్ని సౌకర్యాలున్నా చుట్టూ ఎంతమంది ఉన్నా అమ్మ వచ్చి మొత్తం మార్చేసిన విధానం అనితరసాధ్యం. తను వచ్చిన క్షణం నుండీ హాస్పటల్ లో ఉన్నా కూడా ఇంట్లో ఉన్నంత సౌకర్యంగా అనిపించేలా చేయడం ఒక్క అమ్మకే సాధ్యం.

ఆ హాస్పటల్ లో ఉన్నపుడు అక్కడ డాక్టర్ కి నేను హాస్టల్ లైఫ్ తప్పించుకోడానికి అబద్దం చెప్తున్నా అని అనుమానం వచ్చి పొట్ట ఓపెన్ చేసి చూద్దామమ్మా అసలు ఎందుకొస్తుందో లోపల ఏముందో అని నాతో అంటే అమ్మ ఆయనతో పోట్లాడిన వైనం నాకు ఇప్పటికీ గుర్తే. ఆ మరుక్షణమే తను నన్ను ఇంటికి తీస్కొచ్చి హోమియోపతి మందులతో తన ప్రేమతో రెండు వారాలలో మామూలు మనిషిని చేసేసింది.

ఇక అపుడపుడు మనకి వచ్చే చిన్న చిన్న అస్వస్థతలకి అమ్మ చేతి చిట్కా వైద్యం ఎంత బాగా పనిచేసేదో. ఇంటినుండి ఎంత దూరమెళ్ళినా ఎక్కడున్నా ఇలాంటి చిన్న చిన్న చిట్కాలకోసం అమ్మకి వెంటనే కాల్ చేయాల్సిందే. ఎంత పెద్దైనా ఎంత ఖరీదైన హాస్పటల్స్ లో వైద్యం అందుకున్నా అమ్మ తోడు, అమ్మ మాట ఇచ్చే భరోసా మరెవ్వరూ ఇవ్వలేరు అనేది మాత్రం సత్యం.

మొత్తం చదవండి