అమ్మ జ్ఞాపకాల కబుర్లు

చదువుకోసం హాస్టల్ కు పంపేప్పుడు తన బేలతనం నాకుకనపడనివ్వకుండా దాచుకుంటూ అమ్మ నాకు చెప్పిన ధైర్యం, ఎంత దూరంలో ఉన్నా ఎలాంటి సమస్య అయినా ఫోన్ లోనే తన సలహాలతో దూరం చేసిన వైనం. తనులేకపోతే ఏమీలేదన్న నిస్పృహ, అంతలోనే తనిచ్చిన జీవితం ఉందన్న ఆశ. ఇలా అమ్మ గురించిన కబుర్లు ఇక్కడ చూడండి.

అందమైన బాల్యం

మధురమైన జ్ఞాపకాలతో అందమైన బాల్యాన్ని నా సొంతం చేసినందుకు అమ్మానాన్నలకు ఎప్పుడూ ఋణపడి ఉంటాను. మొదటి సంతానాన్నవడంతో నేనాడిందే ఆట పాడిందే పాట అమ్మమ్మ వాళ్ళింటికి వెళ్ళినా మా ఇంట్లో అయినా అపురూపంగా గడిచింది. పాడుకున్న పాటలు, ఆడుకున్న ఆటలు, స్కూల్ ఎగ్గొట్టడానికి వేసిన వేషాలు, తిన్న చిరుతిళ్ళు, నాన్న వేలు పట్టుకుని కొట్టిన షికార్లు, 16mm సినిమాలు కబుర్లు ఇక్కడ చదవచ్చు.

ఇంటర్మీడియెట్ హాస్టల్ కబుర్లు

నూనూగు మీసాల నూత్న యవ్వనం అమ్మానాన్నలకు దూరంగా నాదంటూ ఓ స్వంత ప్రపంచం. అప్పటివరకూ ప్రతి చిన్న పనికి వాళ్ళమీద ఆధారపడి ఒక్కసారిగా నాకు నేనే నెగ్గుకు రావాల్సిన పరిస్థితులను తలుచుకుని దిగులు. అంతలోనే చుట్టూ ఉన్న స్నేహితులతో నేస్తం కట్టేసి చేసిన అల్లర్లు, పరోఠాల బిజినెస్సులు, చెరకుతోట దొంగతనాలు, ఆడ్మినిస్ట్రేటర్ కి మస్కాగొట్టి చూసిన సినిమాలు, సరదా కొంటె కబుర్లు ఇక్కడ చూడండి.

ఇంజనీరింగ్ కాలేజ్

ఇంటర్మీడియెట్ కి రెసిడెన్షియల్ హాస్టల్ కనుక పంజరంలో పక్షిలా బతికితే ఇంజనీరింగ్ కాలేజ్ యూనివర్సిటీ హాస్టల్స్ లోకి వచ్చేసరికి ఒక్కసారిగా జూలోనుండి పచ్చని అడవిలోకి వదిలేసిన జింక పరిస్థితే అయింది, ఎక్కడికి పరుగులెట్టినా ఏం చేసినా అడిగేవాళ్ళులేరు. అసలు హాస్టల్ బిల్డింగ్ లో నిరంతరం కాపుకాసే వార్డెన్ ఉండడనే విషయం నాకు డైజెస్ట్ కావడానికి నెలపట్టింది :-) నిజమా అలా ఎలా సాధ్యం అని ఇప్పటికీ అనిపిస్తూనే ఉంటుంది. అంతటి స్వేఛ్చాప్రపంచంలో చేసిన అల్లర్లు కొన్ని కబుర్లు ఇక్కడ.

సినిమాలు రివ్యూలు..

నాకున్న అతి పెద్ద వ్యసనం సినిమా చూడడం రిలీజైన ప్రతి అడ్డమైన సినిమా చూసేసి ఈబొమ్మలో చూపించినట్లు తెలుగు సినిమాని భుజాల మీద మోసేవాళ్ళలో నేనొకడ్ని. చూసి ఊరుకోకుండా ఇది ఇందుకు బాలేదు అది అందుకు బాగుంది అంటూ పేద్ద వంద సినిమాలు తీసేసి విశ్రమిస్తున్న మేధావిలా చేసే విశ్లేషణలు :-) హహహ చదివిన ఒకరిద్దరు అలా తిడతారు కానీ నా దృష్టిలో ఒక సాధారణ సినీ ప్రేక్షకుడు చూసొచ్చి మిత్రులతో చెప్పే కబుర్ల లాంటి నా సినీ రివ్యూలు ఇక్కడ చదవండి. ఆరెంజ్, ఖలేజా, కృష్ణం వందే జగద్గురుం లాంటివి కొన్ని ఎక్కువమంది ఆదరణ పొందాయ్.

శనివారం, ఆగస్టు 15, 2009

ఈటీవీ --> ఝుమ్మంది నాదం2

మొన్న సోమవారం రాత్రి 9:20 కి హడావిడిగా ఆఫీసులో అన్నీ ఎక్కడివక్కడ వదిలేసి ఇంటికి పరిగెట్టుకు వచ్చాను. కారణం ముందు రోజు చూసిన ఈటీవి ఝుమ్మంది నాదం వాణిజ్య ప్రకటన. ఆ ప్రోగ్రాం సోమవారం రాత్రి 9:30 కి ప్రసారమవుతుంది. మొన్న సోమవారం బాలమురళీ కృష్ణ గారి తో ప్రోగ్రాం. ఈ సోమ వారం తరువాయుభాగం కూడా ప్రసారమౌవుతుంది. కానీ ఈ రోజు నా స్కెడ్యూల్ ప్రకారం వీలవుతుందో లేదో అని గాబరాగా ఉంది. కానీ ఏంచేస్తాం లైఫ్ ఈజ్ జిందగీ.. అనుకున్నామనీ జరగవు అన్నీ.. అనుకోలేదనీ ఆగవు కొన్నీ.. అని పాడేసుకోడం అంతే.. అసలు సుమన్ వదిలేసాక మళ్ళీ ఈటీవి కి మంచి రోజులు వచ్చాయి. నేను తిరిగి ఆ చానల్ చూడటం మొదలు పెట్టాను. ఈ ప్రోగ్రాం గాయని సునీత ఆధ్వర్యం లో సాగుతుంది. మాములుగానే బాగుంటుంది ఇక మొన్న బాలమురళి గారంటే చెప్పనే అఖ్కర్లేదు కదా.
పండుటాకు లా ఆ మహానుభావుడు కళ్ళెదురుగా అక్కడ కూర్చుని మాటే పాట లా మాట్లాడుతూ మధ్య మధ్య లో కొన్ని పాటలు పాడుతూ ఉంటే నాకు ఒళ్ళంతా కళ్ళు చెవులూ ఉంటే ఇంకా ఎంత బాగా ఆస్వాదించవచ్చో కదా అనిపించింది. నేను ఒక ఇరవైనిముషాలు ప్రోగ్రాం మిస్ అయ్యాను కానీ విన్నా ఆ కాస్తా చాలు అని అనిపించే లాటి పాటలు పాడారు ఆయన. నర్తనశాల నుండి "సలలిత రాగ సుధా రస.." పాట కి సునీత కూడా గొంతు కలిపి, తన అదృష్టానికి పొంగి పోయింది. తత్వాలు పాడుతూ ఆయన మాదేవ శంభో... అన్న చోట భో అంటూ దీర్ఘం తీసినపుడు సాక్షాత్తూ శంఖం నుండి వచ్చే ఓంకార నాదాన్ని పలికించి అబ్బుర పరచారు. ఈ వయసు లో కూడా ఆయన గాత్ర ధాటి ఏమాత్రం తగ్గలేదు. నా అదృష్టమో లేక తను కూడా సమయం తక్కువ కనుక ఆ థిల్లాన ఎంచుకున్నారో కానీ నా బ్లాగ్ లో లిరిక్స్ ఇచ్చిన బృందావని తిల్లానా ని ఆ కార్యక్రమం లో పాడారు, నాకు చాలా సంతోషం వేసింది.

ఇక మధ్య మధ్య లో చిన్న చిన్న చతురోక్తుల తో ఆసక్తికరంగా సాగింది. మీరు సినిమాల లో ఎక్కువ ఎందుకు చేయలేదు అంటే .. "ఏం చేయమంటావమ్మా ఒక సారి నారద పాత్ర చేశా కదా అని అన్ని అవే వస్తున్నాయ్, హీరోయిన్ లేకుండా నేను ఎందుకు చేయాలి? నేను చేయను.. హీరోయిన్ ఉన్న పాత్ర తీసుకురండి తప్పకుండా చేస్తాను అన్నాను అంతే నన్ను పిలవడం మానేశారు...ఇప్పుడైనా సరే అదే చెప్తున్నాను హీరోయిన్ ఉన్న పాత్ర చూపించండి ఎందుకు చేయనూ.. ఏం చేయలేనా.. " అంటూ హాస్యమాడటం ఆయనకే చెల్లింది. మొత్తం మీద కార్యక్రమం అంతా వొళ్ళంతా చెవులు చేసుకుని విని అనందించాను. మీకు కుదిరితే ఈ రోజు రాత్రి ప్రోగ్రాం మిస్ అవకండి, నేను కూడా సాధ్యమైనంత వరకూ మిస్ అవకుండా ఉండటానికి ప్రయత్నిస్తాను.

ఈ కార్యక్రమం నాకు ఇంతగా నచ్చడం వెనుక యాంకర్ గా సునీత పాత్ర కూడా లేకపోలేదు. గాయనీ మణుల్లో అత్యంత అందమైన, అందం కంటే కూడా మంచి కంఠస్వరం, చక్కని చీర కట్టు తో ఆకట్టుకునే సునీత గారి ప్రోగ్రాం చూస్తూ నన్ను నేను మరచిపోతుంటాను.. తన నవ్వు కూడా ఇంత లా నోరంతా తెరచి మనస్పూర్తిగా నవ్వు తూ ఎంత స్వచ్చంగా ఉంటుందో. అన్నట్లు ఎప్పటి నుండో ప్రారంభించాలి అనుకుంటున్న నా పాటల బ్లాగ్ కు మొన్న స్వాతంత్ర దినోత్సవం రోజు ఒక రూపం ఇచ్చాను. ఒక సారి అక్కడకు కూడా విచ్చేసి మీ ఆశీస్సులు అందించండి. బ్లాగ్ పేరు సరిగమల గలగలలు. ఇక్కడ క్లిక్ చేస్తే చూడవచ్చు.

మంగళవారం, ఆగస్టు 11, 2009

వర్షాన్ని విందామా !!

అబ్బే! వర్షం సినిమా పాటలు కాదండీ బాబు, మామూలు వర్షం గురించే నే చెప్తున్నది. మొన్న శనివారం మధ్యాహ్నాం సుష్టుగా భోంచేసి వారం రోజుల కరువంతా తీరేలా నిద్ర పోయానా.. సాయంత్రం లేచే సరికి జోరుగా వర్షం... నే లేచే సరికి వర్షమో లేక వర్షమే నన్ను నిద్ర లేపిందో మరి సరిగా తెలియలేదు. కానీ అంత వర్షం చూసే సరికి లోపల కుదురుగా కూర్చోలేకపోయాను. బయట రోడ్ మీదకి వెళ్ళి తనివి తీరా తడిచి తదాత్మ్యం చెందాలనీ.. అక్కడక్కడా నీళ్ళు నిలిచిన చిన్ని చిన్ని గుంటల్లో ఎగిరి దూకి ఆ నీళ్ళని పక్కలకి చిందించి మళ్ళీ అవి తూచ్ తూచ్ అని హడావిడిగా గుంటల్లోకి వెళ్ళిపోడాన్ని ఆనందంగా చూడాలనీ.. గోడలపై నిలచిన కాసిని నీళ్ళ పై పడే వర్షపు చినుకు లు సృష్టించే అలల అలజడి ని కనులారా చూడాలనీ.. అప్పటి వరకూ ఎక్కడ దాక్కుంటాయో కానీ వర్షం పడగానే బెక బెక ల సరిగమలు వినిపించడానికి వేంచేసే కప్పగారి గాత్ర కచేరీలు వినాలనీ మనసు వెర్రి మొర్రి ఆలోచనలు చేయడం మొదలు పెట్టింది.

తప్పునాన్న ఇప్పుడో పెద్దరికం ఒకటి ఏడ్చింది కదా ఇవన్నీ చేస్తే చుట్టూ ఉన్న జనాలు వింతగా చూసే అవకాశం ఉంది కనుక నువ్వు సైలెంట్ అయిపో అని బుద్ది చెప్పి కూర్చో పెట్టేశాను అనుకోండి కాకపోతే పోర్టికోలో ఏదో పని ఉన్నట్లు అక్కడ అవి ఇవీ సర్ధుతూ కాస్త వర్షం లో తడిచా :-) అప్పటి వరకూ తలుపులు బిగించి నిద్ర పోవడం వల్ల వేడిగా ఉన్న ఒంటి పై చల్లని వాన చినుకు పడగానే ... జిల్లు మని ఎంత హాయి గా ఉందో.. ఈ ఆనందం ఇంకెక్కడా దొరకదేమో ఈ వర్షం లో తప్ప అనిపించింది (షవర్ తిప్పుకున్నా దొరుకుతుంది బాస్ అని అంటే నేనేం చెప్పలేను:). అలా కాసేపు బయటే నిలబడి గోడ పై బడి విచ్చిన్నమౌతున్న వాన చినుకులనీ, ఉధృతమైన వాన చినుకుల తాకిడికి కిందకి వాలిపోయి అంత లోనే మేమేమీ తక్కువ తినలేదు అంటూ తిరిగి పైకి రావడానికి ప్రయత్నించే చెట్ల ఆకులనీ సున్నితమైన పూవులనీ చూస్తూ.. ఆకులపై పడుతూ అల్లరి గా వాన చేసే చప్పుడుని చెవులప్పగించి వింటూ, చల్లటి గాలినీ, అప్పుడప్పుడూ తనువును తడిమి పలకరించిన వాన తుంపరనీ మనస్పూర్తిగా అస్వాదిస్తూ కాసేపు బయటే గడిపి మెల్లగా తిరిగి లోపలికి వచ్చాను.



లోపలికి వచ్చి ఫ్యాన్, టీవీ లాటి శబ్ధ కాలుష్య కారకాలన్నిటినీ ఆపేసి కిటికీ లు తలుపులు పూర్తిగా తెరచి బయట కురుస్తున్న వర్షాన్ని వింటూ ఆ సాయంత్రాన్ని ఆనందంగా గడిపాను. ఈసారి మీరూ ప్రయత్నించి చూడండి వర్షాన్ని వినడం ఎంత బాగుంటుందో... వాన ఉధృతిని పట్టి ఒకో రకమైన శబ్దం వస్తుంది. మొక్కలపై కురిసే చిరుజల్లులు ఒకలా వినిపిస్తే, కొబ్బరాకులపై కురిసే వాన మరొకలా వినిపిస్తుంది. మెత్తటి మట్టిపై నిశ్శబ్ధం గా కురిసే వాన అద్భుతమైన అద్వితీయమైన కమ్మటివాసనని అందిస్తే, రాళ్ళపై కురిసే వాన చేసే హడావిడి చప్పుళ్ళుకి అంతే లేదు, ఇక వడగళ్ళ వాన చేసే శబ్దం గురించైతే ఇంక చెప్పనే అక్కరలేదు. మీరెపుడైనా నది దగ్గర కానీ కాలవ దగ్గర కానీ ఉన్నపుడు వర్షపడటం చూశారా.. నీళ్ళపై పడే వాన పలికించే టప టప ల సంగీతం ఒక ఎత్తైతే అప్పటి వరకూ ప్రశాంతంగా ఉన్న నీటిపై చినుకులు సృష్టించే వేల కొద్దీ అలలు ఒకదాని తో ఒకటి పోటీ పడుతూ, ఒకదానిలో ఒకటి కలిసి పోతూ కలిగించే అలజడి చూడటానికి రెండు కళ్ళూ సరిపోవు. ఇక సముద్రం పై వాన పడటం ఎపుడైనా విన్నారా / చూశారా... నేను వైజాగ్ యూనివర్సిటీ లో ఉన్నరోజులలో నాకు ఈ ఆనందం దక్కింది. అనంతమైన నీటి పై జోరు గా పడుతున్న వాన చినుకులు సృష్టించే హోరు ఇంతా అంతా కాదు, హడావిడిగా ఉండే బీచ్ నుండి కాస్త ప్రశాంతమైన చోటికి వెళ్ళి శ్రద్దగా వింటే ఒక చిత్రమైన హోరు తో కలిసిన లయబద్దమైన సంగీతాన్ని వింటున్నట్లే అనిపిస్తుంది.

సరే మొన్న ఒక్క సారిగా ఇంత వర్షాన్ని వినీ, ఆస్వాదించి, ఆనందించీ.. ఆహా వర్షాన్ని వినడం చాలా బాగుంది కదా.. ఓ టపా రాసేద్దాం వీలైతే ఈ సారి వర్షాన్ని రికార్డ్ కూడా చేసేద్దాం అని తీర్మానించుకున్నాను. అంతలో అసలు ఈ వీడియోలు యూట్యూబ్ లో ఇప్పటికే ఉండి ఉంటాయేమో అని వెతికితే వేలకొద్ది దొరికాయి. వాటిలో మొదట కన్పించి ఉరుముల అలజడి లేకుండా కేవలం వర్షాన్ని మాత్రమే రికార్డ్ చేసిన ఈ వీడియో నాకు బాగా నచ్చింది ప్రజంటేషన్ కూడా మంచి చిత్రాల తో తయారు చేశారు. సో అది మీ అందరి కోసం ఇక్కడ ఇస్తున్నాను. ఈ సంవత్సరం ఇప్పటి వరకూ కురిసిన వర్షపాతాన్ని గమనిస్తే... మన భావి తరాల వారు ఇక వర్షాన్ని ఇలాటి వీడీయోల లోనే చూసుకోవలసిన పరిస్తితి వస్తుందేమో !!

శనివారం, ఆగస్టు 01, 2009

సిగలో.. అవి విరులో -- మేఘసందేశం

గత రెండు మూడు వారాలు గా ఈ పాట నన్ను వెంటాడుతుంది, ఎంతగా అంటే ఎక్కడో అడుగున పడిపోయిన నా కలక్షన్ లో వెతికి వెతికి వెలికి తీసి తరచుగా మళ్ళీ వినేంతగా. కారణం ఏమిటో తెలియదు కానీ ఈ ఆల్బం ఎందుకో సంవత్సరానికి ఒక్క సారైనా ఇలా బాగా గుర్తొస్తుంది. అప్పుడు ఒక నెల రెండు నెలలు వినేశాక కాస్త మంచి పాటలు ఏమన్నా వస్తే మళ్ళీ అడుగున పడి పోతుంది. కానీ అక్కడే అలా ఉండి పోదు మళ్ళీ హఠాత్తుగా ఓ రోజు ఙ్ఞాపకమొచ్చి మళ్ళీ తనివి తీరా వినే వరకూ అలా వెంటాడూతూనే ఉంటుంది. మంచి సంగీతం గొప్ప తనం అదేనేమో మరి !! ఈ సినిమా గురించి కానీ సంగీతం గురించి కానీ నేను ప్రత్యేకంగా చెప్పగలిగినది ఏమీ లేదు. నాకు బాగా నచ్చే సినిమాల మొదటి జాబితా లో ఉంటుంది. కధ, సంగీతం, నటీనటుల నటన వేటికవే సాటి. ఈ సినిమా గురించి తెలియని వారుంటే తెలుసు కోడానికి నవతరంగం లో ఈ వ్యాసం చదవండి. ఈ ఆల్బం లో పాటలు అన్నీ ఒక దానిని మించి ఒకటి ఉంటాయి. సరే మరి నన్ను వెంటాడుతున్న ఈ పాట ని మీరూ ఓ సారి ఇక్కడ చిమట మ్యూజిక్ లో విని ఆనందించండి. మొన్నేమో కళ్యాణం, ఇప్పుడేమో సిగలు, విరులు, అగరు పొగలు అసలూ... "సంగతేంటి గురూ !!" అని అడగకండేం :-)


చిత్రం: మేఘసందేశం
గానం: కె. జె. ఏసుదాస్
సాహిత్యం :దేవులపల్లి కృష్ణశాస్త్రి
సంగీతం : రమేష్ నాయుడు.

సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో..

ఎదుట నా ఎదుటా ఏవో సోయగాల మాలికలు..
ఎదుట నా ఎదుటా ఏవో సోయగాల మాలికలు..
మదిలోనా గదిలోనా... మదిలోనా గదిలోనా...
మత్తిలిన కొత్త కోరికలూ...నిలువనీవు నా తలపులు..
మరీ మరీ ప్రియా..ప్రియా...
నిలువనీవు నా తలపులూ.. నీ కనుల ఆ పిలుపులూ..

సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో..

జరిగి ఇటు ఒరిగీ... పరవశాన ఇటులే కరిగి
జరిగి ఇటు ఒరిగీ... పరవశాన ఇటులే కరిగి
చిరునవ్వుల అర విడినా.. చిగురాకు పెదవుల మరిగీ..
చిరునవ్వుల అర విడినా.. చిగురాకు పెదవుల మరిగీ..
మరలి రాలేవు నా చూపులూ.. మరీ మరీ ప్రియా ప్రియా
మరలి రాలేవు నా చూపులూ.. మధువుకై మెదలు తుమ్మెదలూ...

సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో..

నేను ???

నా ఫోటో
అర్ధంకానివాళ్ళకో ప్రశ్నార్థకం, అర్ధమైన వాళ్ళకో అనుబంధం. ఈ లోకంలో ఎందరో పిచ్చాళ్ళున్నారు. డబ్బు, పదవి, కీర్తి, కాంత, కనకం, ప్రేమ, సినిమా, మంచితనం, తిండి ఇలా ఎవరికి తోచిన పిచ్చిలో వాళ్ళు మునిగి తేలుతుంటారు. నేనూ ఓ పిచ్చోడ్నే.